Košarkaši podgoričke Budućnosti su protiv Mege Sokerbet ostvarili osmu uzastopnu pobjedu u ABA ligi rezultatom 92:79. Iako konačan rezultat navodi na zaključak da je ovo bila lagana i rutinska pobjeda za Podgoričane, nije bilo tako – bio je ovo vrlo uzbudljiv meč, u kojem je odluka o pobjedniku pala tek u posljednjoj četvrtini, koju je Budućnost dobila rezultatom 18:12.
Za prvih šest minuta posljednje dionice, Podgoričani su napravili seriju 16:3, otišli na plus 20 i riješili pitanje pobjednika, ali ključni trenutak meča se dogodio na samom kraju treće četvrtine – Mega je promašila “alej-up” kojim bi smanjila na samo minus tri i umjesto toga je uslijedio faul, Budućnost je otišla na plus sedam, potom je uslijedio furiozan početak zadnjih deset minuta i tu je bio kraj.
Јoš jedan razlog pobjede Budućnosti leži u činjenici da su imali samo deset izgubljenih lopti, dok ih je Mega imala čak 18. Nikola Ivanović je bio igrač utakmice protiv bivšeg kluba, pošto je postigao 20 poena, a imao je još šest asistencija i tri skoka.
Uz Ivanovića, odličan je bio Melvin Edžim sa 15 poena, dok je poen manje ubacio Džastin Kobs, a 13 je pored svog imena imao Petar Popović.
Kod Mege je uobičajeno najbolji bio Filip Petrušev sa 28 poena, pratio ga je još uvijek sedamnaestogodišnjak Nikola Јović sa 15 poena, a takođe mladi dvadesetogodišnji Karlo Matković je dodao 13.
